《出走大洋路》系列 - 英語水平

上回提到,筆者必須應考英語水平測試,並且最少需達Proficient水平才有機會入閘排隊等申請。

談到考試,筆者真的好久沒嚐過考試的感覺了。自從筆者在2013年完成專業考試最後一份卷(也是最難的一份)後,已經四年多沒有入過試場;若只計入英語水平測試,對上一次更已經是2010年的事。忽然要溫書、然後連續幾小時高度集中地應對自己較弱的能力,而且還有一個必需達到而自己不能輕鬆達到的要求,真不算是件容易的事。

除了要下點功夫外,更重要的的選擇考試的策略。澳洲移民局接受不同的測試機構,包括大家最熟悉的TOEFL, IELTS,還有筆者未聽過的OET, PTE和CAE。筆者在N年前已經因不同原因考過TOEFL和IELTS,從來未嘗完全達到過澳洲移民局要求的Proficient水平,當中又以IELTS的分數和目標距離較遠。於是,選擇應考那個考試便和自己的各項英語能力掛勾:

由表一可見,筆者在中五時以「爛到不行」的英文去應考拿了個全D,然後在中六瘋狂自學惡補(日日自己對住SCMP大聲朗讀1-2小時)。其後筆者的英語雖然進步了,但Speaking明顯遜於其他能力,其次是Listening,相反Writing的成績則比較穩定。


再看表二,移民局對於TOEFL和IELTS的成績要求十分不同,IELTS要求全部7分,但TOEFL對Speaking的要求卻特別低,真是正中下懷。雖然十年前的TOEFL Speaking成績未達Proficient水平,但只差1分。

筆者工作近八年,當中有超過三年半需要頻密地說英語,斷估多年來Speaking/Listening應該有些許進步,反而其他能力可能退步了,偏偏Reading和Writing的要求相對筆者的能力而言,屬較低水平。這實在是天助我也!

最後,TOEFL每次報名要$1600,而IELTS卻要$2100,識得揀一定揀TOEFL!

補充一點,IELTS考試其實可以選擇General和Academic兩種,而TOEFL傾向是全Academic。網上很多人都說IELTS General Exam其實容易得多,相對上TOEFL考試牽涉不同科目的學術用語,艱深得多。但筆者卻剛好相反,對平時無定向聊天比較弱,反而學術性討論、分析及Fact findings才是強項。要我考General Exam,可能有反效果呢!

(待續)

留言

  1. Rx10兄英文其實很強呢,起碼對我來說。當年我的HKCEE Eng Sys. B只是剛剛及格,要在很多年後考CRE才拿到第二級,真係醜怪,哈哈。

    回覆刪除
    回覆
    1. 小弟的英語成績跟風兄的差不多, 基本上語文是小弟的死穴, 而我最勵害的就是中文作文和英文作文, 同樣都是 "U"。幸好其他还可以才能保得住合格。

      刪除
    2. 風中兄和斗滿兄,我會考時的英文真是差得好緊要的,可能因為識考試,成績才夠升班。

      反而我真係幾proud of預科時一把年紀(一般認知語言要靠幾歲學才學得好)憑自己努力仍能有明顯進步,兩份卷由D升A,都算有血有淚。

      至於作文,我由細到大都好喜歡,不過以前只限中文,後來英文都勉強可以。

      刪除
  2. 不錯呀, HKALE C 已唔失禮
    雖知A+B+C的人數已等於HKCEE 的A 人數

    IELTS 7分叫做PROFICIENT 啦

    回覆刪除
    回覆
    1. Thanks 小子兄,我最差係speaking,呢次拎到C係有段故的。

      話說當年UE oral小弟係冇乜信心,因為十年都唔講一次英文,淨係對住報紙讀又有幾大幫助?點知一入去,有個身上發出緊強大自信氣場嘅女仔Candidate A,一開口就用native english狂掃全場,我睇到另外兩個考生紅都面哂,我就知道係時候爆seed了。

      輪到我獨白時,唔知邊度來的自信難得流暢地爆完全文,仲要時間控制啱啱好,另外兩個考生就一個D/E水平,另一個係E/F水平,機會來了。

      討論時間Candidate A瘋狂爆seed 想dominate 全場,我就用擔當有禮貌地interrupt嘅role去表達自己意見同埋邀請其餘兩位考生講嘢,嗰一次我真係覺得自己做得好好,幫到人又幫到自己。可惜EF考生當時已經面如死灰,根本無力挽救,只剩DE考生同我奮力頑抗,合力抵禦Candidate A一浪接一浪嘅攻勢。

      終於過左度秒如年嘅六分鐘,除了EF考生雙眼變得水汪汪外,大家都鬆一口氣。考官表示可以離開的一刻,EF考生為免淚如泉湧,一個箭步衝出課室門口,極速消失在舊校舍灰黃色的走廊盡頭。此乃天意弄人,我只能為他祈禱。

      離開時和A小姐和DE小姐聊天,得知A小姐原來來自DGS,終於恍然大悟。面對此等猛將仍然負隅頑抗,十二年過去仍然歷歷在目。

      寫到呢個位我feel 到自己仍然心跳加速,全因我真係好冧Candidate A............










      嘅 pronunciation同accent。無論點練都好,拍馬都追唔到。

      刪除
  3. 看到R先生的英語能力自述過和經工作的洗禮,英語能力考試一定達標。
    純粹估算,你現職業應會是會計專業範疇,現在澳找工的問題不太大。
    祝好運!

    回覆刪除
    回覆
    1. 謝Ray兄,筆者並非從事會計專業,如果係就慘了,2018年到目前為止,澳洲移民局對會計專業發出的邀請數目是.................零。

      至於英文嘛,睇下咩叫達標啦......達到自己目標但達唔到移民局目標,也是徒勞。

      刪除
    2. 是我對最新情況脱軌了。

      昨晚與自墨爾本回港的朋友談及移民申請,現確實門檻提升很多,比我們當年難和程序複雜,可能是申請人多關係。

      談到墨爾本情況,朋友說:現移民多,交通繁忙,公共設施漸追不上人口增加,尤其屋價很貴。現應非我們當年的新移民選擇。

      朋友建議,能移居前抽點時間到想移居的不同省地方住住,實地了解一下,會較清晰自己的取向。

      刪除
    3. 四年前我到過澳洲一次,去過墨爾本、悉尼和Tasmania。

      墨爾本的確非常多移民(我當白人都不是移民),我自駕在城市也遇上塞車,但和香港真是完全沒得比。樓價貴就一定,就算買到離市中心30-40分鐘的車站附近,也要六七千蚊一呎,要住大一點成本十分高。

      原本我和太太也計劃如Ray兄的朋友所說,在不同省份暫居,了解一下哪裡最適合。但是如果我不停搬家,我暫時未想到如何解決mailing address的問題,所以可能也會選一個便宜的地方先紮根,再考慮其他地方。暫時我發掘到黃金海岸的townhouse/house都相當便宜,可能會成為我首個落腳點。

      刪除
  4. 看到R先生的英語能力自述和經工作的洗禮,英語能力考試一定達標。
    純粹估算,你現職業應會是會計專業範疇,現在澳找工的問題相信不太大。
    祝好運!

    回覆刪除
  5. R兄語文其實真係唔錯,而且仲好勤力,我諗要進步到樣樣有A有B都係時間問題~

    小弟CE: ABAA -> A ; AL: ACBAE -> C

    回覆刪除
    回覆
    1. 勁呀Ryan兄,從你的CE成績我估你自小已經學好語言,AL都係因為畀PS屈機而已。

      如果要我而家畀心機考多次UE,我相信拿B是有可能的,A就應該永遠都唔會達到了(有時間都唔會操到完美,不如日常多用英語溝通好過)。

      刪除
    2. //從你的CE成績我估你自小已經學好語言
      咁真係要睇你點定義「自小」,因為我小學一至五年級英文測驗考試默書都未試過合格。小六開始遇到嚴師先逼到我溫下書爭取一下分數,成績合格。

      R兄上面講話「反而我真係幾proud of預科時一把年紀(一般認知語言要靠幾歲學才學得好)憑自己努力仍能有明顯進步,兩份卷由D升A,都算有血有淚。」,其實人類語言學習既能力唔會因為年歲而有影響,正如我而家去學數學(邏輯語言),都可以學得到,R兄講既幾歲先學得好既地方,應該係指讀音/口音/intonation呢類比較受腦部既plasticity(語言學用語,中文唔知係乜),一般嚟講過咗17歲,口部肌肉會「硬化」,變到好難發出一啲唔熟悉既聲母韻母(例如我就到而家都未發到西班牙文既Guttural R),但其實都係有得練的~!

      刪除
    3. 謝謝回覆,Ryan兄果然是語言相關專業人士,馬上便拆解了我多年的誤解。我一直以為「幾歲是學語言的最佳時機」,原來只是為了學到native的口音。難怪我死讀爛讀,一讀得快時pronunciation總是不準確,又或者走甩了尾音等,但是閱讀和寫作就明顯見到進步。

      可惜我怕醜,開口總是怕讀錯音、錯重音、錯音調、錯grammar,明知就算講到一舊舊,或只講出一半意思,對方也多會明白(或可以clarification去明白),仍然很hesitate去開口。少開口結果又練不好,形成惡性循環,所以在職場要多說英語的時候,我的表現一直也不太好。

      刪除
    4. 口部肌肉既fossilization,搞到想讀果個音讀唔到,而腦部失去plasticity,搞到分唔到相近既元音輔音之間既分別,呢啲其實都係可以死練追返返嚟。

      我識有日本朋友仔,大學先去英國留學(你知日本人的會話係幾咁恐怖),最後都可以在成人階段練得一口Queen's accent (Received Pronunciation, RP) (有機會再發文討論練習方法),所以真係事在人為架咋。

      R兄似乎都係比較內斂同elf-conscious既人,所以要開口大聲講嘢會覺得有啲為難。語言學裡面有一個有趣既實驗,研究人員要求參與者係一個PARTY入面盡力用第二語言(e.g.英文)同人傾計,初頭啲人都好似R兄咁唔係咁夠膽講,或者因為猶豫而吞吞吐吐咁,跟住研究人員要佢地飲少少紅酒,飲到有輕微醉意,神奇既事就發生了,佢地之後講英文唔知點解好似奧巴馬咁咁流利啦。呢個實驗顯示,影響流俐程度既並唔係人本身既語言能力,而係所謂既affective barrier(心理障礙),只要去除此心魔,就可以事半功倍了。君不見厚面皮既人,通常都比較敢講嘢,亦比較流俐,就係因為佢地無乜心魔XD 而小弟正是有些少厚面皮既人 LOL R兄絕對可以落老蘭試下呢個方法HAHAHA 但要小心唔好飲到太醉,否則會有反效果同埋要老婆嚟執屍就唔係幾好XD

      刪除
    5. 首先Ryan兄分享練習方法,小弟仍然好有興趣學習同改善語文能力。

      至於後段實在不得不佩服,Ryan兄真係超勁,所言全部中哂小弟的經驗。(是否手指飲了紅酒?)

      其實都唔洗落老蘭,每次飲完酒,英語能力例必爆seed(當然唔可以飲太多,兩杯之後就會開始speaking faster than thinking,變得語無倫次),係舊公司每次office Friday drink都不自覺講咗流利咗。

      試過兩次有幸出席talent table,breakfast嗰次吞吞吐吐無乜表現,dinner嗰次就同個Managing Director吹咗全晚水,而家諗返應該要多謝杯紅酒!

      想請教Ryan兄,affective barrier除了飲酒外,有咩方法可以永久性去除? 點樣能夠令自己更厚面皮呢? 段估冇理由啲內歛人每餐都飲杯紅酒去keep住全日有輕微醉意呱XDD?

      P.S.: 要執小弟屍應比較難,除非spirit + wine + beer 三管齊下兼兩小時內隊 >200cc 酒精成份,再唔畀我嘔才成XDD

      刪除

    6. //affective barrier除了飲酒外,有咩方法可以永久性去除? 點樣能夠令自己更厚面皮呢?
      厚面皮都可以係後天練成架,好似鐵砂掌咁,你日日係度雙手插沙,不出一個月就成手都係繭,到時插仙人掌都無問題。

      小弟都係中學果陣成日俾老師捉去參加啲辯論比賽(雖然成日俾啲名校生大炒)或者上台早會做presentations,就練大咗個膽,夠膽講嘢,而且仲係爭住嚟講,就算好多grammatical mistakes/pronunciation errors都係咁勇往直前。R兄參加既TALENT TABLE都應該有同樣效果,可以玩多啲,驚既就隊兩杯紅酒啦﹗每餐都飲紅酒,我諗日子有功應該慢慢就唔洗再飲了吧?哈哈

      仲有好多方法,我諗真係要擇日撰文再敘。

      //
      P.S.: 要執小弟屍應比較難,除非spirit + wine + beer 三管齊下兼兩小時內隊 >200cc 酒精成份,再唔畀我嘔才成XDD

      嘩,估唔到R兄咁好酒量,搵日要同你較量一番先得!! XD

      刪除
    7. 哈哈哈,果然還是要功多藝熟,受教了。可惜而家轉工後已經無talent table這回事,不能再隊酒練習。

      十分期待Ryan兄撰文詳述 !

      刪除
  6. 哈哈,識睇一定係睇 Comment!好有興趣知道 R 兄太太讀過 Candidate A 一段的反應 XDD

    欣賞的是 R 兄中六的發憤,日日自己對住SCMP大聲朗讀 1-2 小時,很多人知道這個方法有效,就是沒有這樣的勇氣和恆心。

    回覆刪除
    回覆
    1. 哎呀,打錯字,應該是「發奮」 :D

      刪除
    2. 哈哈,福祿壽兄真識貨。太太的反應不便透露啦XDDD

      大聲朗讀有一個好處,就是用一份時間,同時睇一次、聽一次、講一次,做到三倍效果。配合埋查字典,寫作和閱讀時都較容易從記憶中尋回學到的辭彙和句式,比夾硬背生字更有效。Drawback就是對listening和speaking無甚幫助,前者還可以睇戲、睇TV學,後者幾乎必須靠和真人互動。

      刪除
  7. 預祝Rx10兄成功!但現時好多考試都係over-drilling, 而非考核學生真正的語文水平~

    回覆刪除
    回覆
    1. Thanks Cherry, 道高一尺魔高一丈, 有考試自然就有應試技巧, 任何考慮最終都會益咗考試機器。

      刪除
  8. 識睇一定係睇 Comment!哈哈哈,留言真係好精彩,預祝Rx10移民一帆風順

    另外想借個地方來問問Ryan兄,請問你去邊度學數學(邏輯語言)呢?
    因為小弟最近都學緊相關既野,想睇多少少數學既野去打好個底。

    回覆刪除
    回覆
    1. 艾力兄, Ryan兄遊日太久, 可能沒有看到你的留言, 你可能否稍移玉步到他的blog再留一個言~~~

      刪除
  9. 話說我當年CE , 中英文柯佬都遇上同一個神級女隊友, 生得清純秀麗, 至今仍難以忘懷

    我英文柯佬都係弱雞到爆
    大學玩左隻online game, 全球玩同一個server, 焗住要開咪同鬼佬講野, 講講下IELTS都考到7.5

    回覆刪除
    回覆
    1. tam兄,一年考生有十萬,兩次oral遇上同一人可是萬中無一的緣份......你是否欠了一些下文無寫出? XDDD

      打機打到7.5分,果然是打機達人,抵你長持ATVI屢有斬穫!

      刪除
    2. 下文就係冇下文, 佢有佢既生活, 我有我既忙碌 (好似係)

      刪除

張貼留言

這個網誌中的熱門文章

澳洲稅務入門 (2) - 稅務居民的稅制

九月流水賬 (2023)

四月流水賬 (2023)

八月流水賬 (2023)

五月流水賬 (2023)

六月流水賬 (2023)