無病呻吟

有一句話筆者很喜歡:「你永遠不能叫醒一個裝睡的人。」不知出處在哪。

每個人都有選擇自己生活方式的權利,你喜歡打工,他喜歡創業,我喜歡Hea富,大家都有自己的路,沒有對錯之分,亦無需要向任何人交代(家人除外)。然而,若選了X,就不要期望會得到Y的成果;若乜都唔做,就唔好期望良性改變會自動出現。

話說昨天筆者的朋友圈中傳來一則新聞,指紀律部隊退休年齡可延至60歲。
(A/B = 朋友,C = 筆者)

A: 梗係唔延啦,55歲退休都覺得耐

B: 好多人都係hea住返工

A: Hea住返都係浪費生命,每日困係 office 7,8個鐘

B: 而家我都覺得浪費時間生命,但係唔返工可以點

C: 咁你咁多年來都覺得返工浪費,但又乜都唔做,唔通你認為solution會自己出現

B: 所以咪返工囉

C: 返工 = 浪費生命 => Solution = 返工,Goodest logic

B: 這是懶人的解決方法

大佬B,你知唔知自己up緊乜嘢? 點解可以跳step跳成咁?我真係跟唔到。

筆者認真地思考良久、絞盡腦汁後終於推斷出問題出在哪裡:

返工 = 浪費生命 ==== (我唔想諗) ====> Solution = 返工

加入一條萬能key,無論後面的等式是甚麼都可以,這真是完美的邏輯?

************************************

讀者可能覺得只是筆者太執著而已,也許朋友B只是廢up回應吧?

或者讓筆者倒敍一下,大家返到九年前...

朋友B大學畢業後,在一家公用事業公司從事專業工作,一年後收入比筆者遲一年起步還要高50%,之後轉過一次工到半公營大公司工作,收入雖然沒有大升但每年穩步增加。最近加入政府,仍從事專業職系,年薪約80萬,個人積蓄有200多萬。30歲仔,條件還算不錯吧?

對,絕對是好仔一條。但是他的視野和觀察力出了很大問題,而不自知。

他總是絮絮不休地抱怨工作環境、家庭問題、社會不公,說了很多Exit options但從來不執行,屢屢不敢下決定就索性以「等」字訣待之。他看到很多問題,卻看不到任何機會。

他投訴每一份工作無聊、程序垃圾、上司無能、管理層肥上瘦下超賤、行業前景灰暗,但卻看不到公司的股價節節上升。工作無聊而待遇不公,但又不想make effort轉工,幸好最終等到了政府的垂青。

他指責樓價上升,令他一家(六年前)賣樓後換不成三房單位。筆者說不如一拆二,或者自己買一間上車盤,即使追不上也不致落後太多,結果父母不贊成所以拉倒。去年他說後悔沒這樣做,現在自己連一房都負擔不起,想問父母借錢過渡,父母又不贊成,惟有不買。

他埋怨現金越來越縮水,人工加了好像生活還困苦。七年前初入股場就引發股災,從此「斬腳趾避沙蟲」,索性齋儲錢不投資。筆者建議重新出發、認真學習投資,回應是:「算啦,我都係唔適合投資。」

他說香港的環境變差,生活成本極高、年青人機會少、理想沒有出路,生活迫人。其實八年前讓筆者初次接觸移民的正是他,但他光說不做,八年來progress都沒有。現在加入了政府,執行移民計劃的可能性更低了。

難道這一切說穿了就是因為「我唔想諗」?

************************************

筆者再想深一層,也許他其實是不想尋找出路。

他不願從裝睡中醒過來,因為一旦醒過來,他便要不停地面對抉擇。醒來後不能再依父母之言,而是自己要下決定。為了推搪這一天的來臨,惟有不斷無病呻吟、怨天怨地,將自己的無能偷換成他人的責任。

說到他一文不值,當然不公。一來他絕對是一個有為青年,二來他十分知慳識儉、以至毫不投資仍有不錯的財政基礎,三來為人非常孝順,而最重要的是他作為朋友,水準絕對一流,是兩脇插刀那種。但說到人生交叉點,總有點「恨鐵不成鋼」的感覺。

筆者感到悲哀,但並不悲觀,因為起碼有一件事他是很有決心:結婚生子。筆者預期這將成為他的人生轉捩點。

但願如此。

(還有,希望他看不到這篇文啦。)

留言

  1. 一首老到掉牙的老歌講哂人生應有的態度(得閒聽下好振奮!)。有人無病呻吟,有人積極面對。因為"苦困皆自願",及"過去已是過去,永遠也是只在今天共明天"。再貼下俾師兄振奮一下!

    <>
    命途命途滿是得失分界線
    每步每步都似踏進交叉點
    當初不信命運但信機會
    直到今天自信的心仍是不會變
    只盼可以抓緊光陰一寸寸
    往日那份衝勁自信不會斷
    艱苦險惡道路續上一段段
    論到得失未到終點誰又可計算
    用自信心完成每一天
    更多更詳盡歌詞 在
    過去了似未能還完
    爭勝心是長遠
    苦困皆自願 心願自信定能圓
    一切皆自願 只管耕耘成敗不去算
    步伐也許難如往常那麼顛
    過去已是永遠也是
    只在今天共明天
    苦困皆自願 心願自信定能圓
    不理多辛酸 只管耕耘成敗不去算
    今天陽光正暖 我的心更暖

    回覆刪除
    回覆
    1. 多謝三人行兄振奮,雖然我未聽過呢首歌,但睇歌詞都明白師兄苦心!

      刪除
    2. 留言本來有歌名的,但不知為何不見了。

      首歌係:交叉點 / 主唱:夏韶聲
      https://www.youtube.com/watch?v=XZbCX6K4I0Q&list=RDMMXZbCX6K4I0Q&start_radio=1

      刪除
  2. 很好的提醒,謝謝分享,人生應該選擇自己行的路~^^

    回覆刪除
    回覆
    1. 沒錯,條路自己揀,hihi唔好喊。

      我相信無論幾hihi的路,都有佢值得回味之處。

      刪除
  3. 哈,我都有一個類以的朋友,怨天怨地但從不作出突破,行的是佛系生活法,但講的是憤青說話,光說不做。

    回覆刪除
    回覆
    1. 風中兄又擊中要害,佛系光說不做都算了,朋友B有時甚至專登做啲negative value的事情,我覺得用佛系形容已太抬舉他了!

      刪除
  4. 執行力X 持久力 X 正向思維 X 聆聽學習 X 自我反思

    一個人要有正向思維, 先會肯探索無限的可能性, 看似ON9, 其實係慢慢跳出自己COMFORT ZONE
    例如1開2, 先要有正向思維覺得係DO-ABLE
    再來會聆聽/學習找資訊
    跟住要不斷去反思, CHURN YOURSELF 到極致

    呢個PROCESS 仲要堅持地執行, 先會有一個FAVORABLE的結果, 就好似R兄咁, 移民, 玩足你幾年, 其間不眠不休pushing the limit 去睇有咩可行方法, 此路不通就再找方法
    不斷問足900幾次先會有些少眉目

    可能你的朋友A/B , 字裏行間都唔似係"迎難而上"的一批

    呢個世上沒有懷才不遇, 只在乎自己無做足夠的野去MAKE IT HAPPEN

    回覆刪除
    回覆
    1. 「一個人要有正向思維, 先會肯探索無限的可能性, 看似ON9, 其實係慢慢跳出自己COMFORT ZONE」

      快兄呢句說話值得回味,我諗起唔少心靈雞湯類文章,或者鼓勵sales的書籍,都被冠以on9之名。但其實好睇自己點樣將on9嘢變成自己的精神食糧,呢個世界上冇嘢係完全冇用的。

      「可能你的朋友A/B , 字裏行間都唔似係"迎難而上"的一批」

      朋友A係okay的,樂觀正面積極面對人生,係逆境自強type。有機會都可以講下佢的經歷,好多嘢值得我自己學習。

      「呢個世上沒有懷才不遇, 只在乎自己無做足夠的野去MAKE IT HAPPEN」

      懷才不遇其實多數係因為安份守己,冇得怨。

      刪除
  5. 結婚生子應該會是轉捩點吧,除非未婚妻財政狀況更佳,否則,單從朋友 80萬年薪但要摃起一家三口連租金看來,應該很難再裝睡吧。

    回覆刪除
    回覆
    1. 財務方面真係唔sure佢會唔會醒,我估起碼會自置物業呱。但我們常常兜口兜面恥笑佢
      ,話佢買樓之時便是見頂之時。

      佢話佢計過數,就算唔升職,keep住跳point及加通漲,到頂薪都有130萬一年,之後仲會繼續加通漲,再加上政府非常慷慨的MPF plan,只要有層自住樓,一家三口實冇問題喎。咁佢咁講我又真係吹佢唔脹ge,唔係人人都想要選擇權,有啲人係喜歡打一世工,亦無不可。

      刪除
    2. 其實佢咁選擇又無乜問題,安穩過一世又有安全感。問題係佢既然選擇咗呢條路,就唔好怨天怨地啦,路係自己揀的。

      刪除
    3. 係啊。不過我估佢10年後又會開始埋怨冇搞移民啦,哈哈哈!

      刪除
  6. 每人身邊總有幾個咁既朋友。做朋友無咩問題, 一提到理財,賺錢,想達到人生咩高度,就避而不答,就十問九不知,就聽天由命,就裝睡......

    回覆刪除
    回覆
    1. 這些人當中又分為玩世派、玩樂派、無能派等,而最慘是這種未開竅派...又冇玩過,又唔係無能注定失敗,夾係中間,有苦自己知...

      刪除
  7. 生活兄你好,我最近也開始寫投資blog,多多交流。
    我都有很多類以的朋友,成日埋怨但從不take risk。有時唔上唔落先係最消磨人動力ge狀態

    回覆刪除
    回覆
    1. 安利兄你好,歡迎光臨。

      係架,無風無浪,好快就一世人...

      刪除
  8. Reading your recount of the conversation, I recalled a quote : "The definition of insanity is doing the same thing over and over again, and expecting different results".

    I guess most people are insane in that sense haha.

    回覆刪除
    回覆
    1. That's why we have science! But living is an art.

      刪除
  9. 值得反思, 多謝分享!

    回覆刪除
  10. 回覆
    1. 無任歡迎,多謝你的免費信用卡資訊!

      刪除
    2. 善於套出信用卡資金來買股~~

      剛剛加入連結了

      刪除

張貼留言

這個網誌中的熱門文章

澳洲稅務入門 (2) - 稅務居民的稅制

九月流水賬 (2023)

四月流水賬 (2023)

八月流水賬 (2023)

五月流水賬 (2023)

六月流水賬 (2023)