十月流水賬

2022-10-03

買入三個多月後到期債券,潛在回報 95%。

這隻只有六七成把握,但市場卻認為只有兩三成希望,值搏率搭夠。

走火入魔?

最多咪嘔返廿幾蚊畀佢...CFLD 一隻都輸成兩嚿水啦...

2022-10-06

疑似中伏。有消息人士話公司有銀團貸款想延期還,如果屬實係幾驚嚇。

問題是,尋日先撤銷標普評級,今日即刻傳延期,有無咁巧合?乜消息人士唔知道國慶長假,有利息到期會唔假期前安排好或者傾?長假期除咗 default 可以做到啲乜?我唔相信內房經歷咗一年風暴仲會咁豬兜。

消息雖然幾假下,但係市場好 buy。

無他,內房債杯弓蛇影已不是新鮮事。加上價格已近展期價,呢個價沽仲唔係司馬昭之心?

不得不承認的是,買入價安全邊際不夠高。之前齋諗國慶假期前後(加上二十大嚟講),宏觀上唔會有大件事,忘記長假期間境外先係搵食時機。

又上一課。

2022-10-11

唉!明明九月底話咗十月圍城唔好亂搞。今次真係走火入魔啦!

旭輝美元債違約。

手起刀落,十日輸 72% 離場。唔計衍生工具,從未試過咁短時間輸咁大幅度。

冇辦法,願賭服輸,話明係賭佢死唔去,衰咗我唔會再磨爛蓆。只係冇諗過佢會直接違約 interest payment,而唔係違本金,搞到斬纜時連 coupon payment 都拎唔返。

今年十戰全勝紀錄斷纜。

2022-10-21

外電報導, Debtwire引述兩名知情人士報導稱,綠地於10月15日拖欠包括公司原本3億美元而後擴大的銀團貸款。報導中兩名人士都未言明分期償付規模。綠地並未回應媒體的置評請求。綠地2023到期的6.75%債券挫12.7美分,至17.2美分,邁向5月崩跌以來的最大挫幅。

又係臨天光瀨尿。

這張只剩三星期便到期,按過去綠地的經驗及推斷,突發違約的機率非常非常低。即使報導中的銀團貸款沒有還錢,也不代表綠地不會還美元債,因為這間公司本來就喜歡不跟章法出牌,會選擇性還錢。

但是,被旭輝一役嚴重打擊後,脆弱的信心傳導到其他持貨。

GRNLGR 到期前三星期止賺離場,只賺 18%。(原計劃可賺 69%,上星期賬面仍賺緊 45%)

當失去信心了,利潤就不再屬於投機者。

再次證明,做錯一個決定,影響遠不止那次止蝕的成本。

這個十月,儘管沒有被股災拖累,卻因一次失手、三個動作就輸掉了七位數,令下半年以輸錢作結。

2022-10-24

痴咗線,我竟然將沽出債券的資金做了美金定期。

差不多十年無做過定期了,十年前還是做人民幣。真是滄海桑田...

2022-10-27

GRNLGR 90蚊。

被震走了,真的好失敗。

該放手時心太軟,該堅持時心太狠。

2022-10-31

又死一件,十月果然恐怖。

绿地控股集团公告称,拟对旗下9只美元债就展期事项发起同意征求,其中2023年6月到期6.65%美元债展期一年,其余债券均展期两年,展期期间票息不变。 据了解,本次征求于11月11日下午4时(伦敦时间)前同意的早鸟费为0.5%本金,11号后 18日下午4点(伦敦时间)之前同意将只支付0.25%本金。上述债券在原到期日将偿付5%本金,剩余95%将于展期后到期日偿付。

好彩之前震走咗,避過一劫,我應該要笑嗎?

不...

因為在非常有限的選擇內,又少了一員猛將。

還未死的,真係一隻手都數得哂了...

留言

  1. CIFI? 真係估唔到可以短時間之內情況突然差咁多。

    回覆刪除
    回覆
    1. 如果真係情況差咗,亦都只係市場造成ge自我實現。

      起碼眼前呢一刻,我仍然相信情況係唔會突然大幅改變,尤其是內房風暴已發展咗咁耐。

      刪除
    2. 最奇怪係股價半年來一直向下,但23年債就哩半個月先突然大跌

      刪除
    3. 最新消息應該係瓜咗,而家幾錢都冇人接

      刪除
  2. R bro 玩債玩到出神入化...

    回覆刪除

張貼留言

這個網誌中的熱門文章

三月流水賬

澳洲稅務入門 (2) - 稅務居民的稅制

二月流水賬

八月流水賬

四月流水賬