資產再波動時


真正的股災來了。

自從 2016 年回到流動資產市場,開始投資收息資產至今,一直未受重大考驗。即使 2018 年末一役,也不過是幾十萬上落,不足為懼。

2020 年,殊不知甫從正職退下來,一心打算靠收息在袋鼠國享受退休生活,便迎來這個三十年一遇的美帝熔斷災難。雖然筆者經歷過恒指累跌 66%、杜指累跌 56% 的金融海嘯,而這次股災杜指「僅」累跌約三成,但今次股災的突發性、單日波幅的驚嚇性,較傳統熊市末期還要誇張。原來投資者在面對具生命威脅的事件時,其短期恐慌程度實不亞於金融機構連環出事。

老王兄在二月十三日寫的一篇《彷彿沒有武肺》,回頭一看,猶如當頭棒喝。當時筆者對中國的疫情感到非常樂觀,加上踏入新階段需要達成一些無必要的目標,令筆者堅持谷大了總投資額,股災一來臨,損失也被放大了。

正是空得意目光如麻,誰料金屋變敗瓦。

遇上一單又一單黑天鵝事件,太早動用了孖展增持資產,結果是無法在周街平貨時再買入,最多只能不斷換馬,賺些微薄的 Alpha Return。對於組合賬面損失來說,只是杯水車薪。

一次又一次恐慌性拋售後,信心也開始崩潰。市場失效,筆者的腦袋也開始失效了。

粗略統計後,流動資產的賬面虧損雖然是空前巨大,卻還不及筆者與太太退休前的年收入。然而這一次,失去主動收入的我,著實感到進退失據。

筆者在流動資產上累計所賺的利潤(包括電能一役),有超過七成已遭是次股災的賬面和已實現虧損吞沒。這表示筆者近三年多的金融投資,扣除加按出來的利息開支後,淨回報可能只剩幾十萬。

事已至此,懊惱也沒有用,Arbitrager 兄最新文章《關於XX》說得很好,輸錢不是 stop sign,是告訴你投資操作上出了問題。這個時候除了檢討外,更應好好地執行。

年初截至上星期五,以 IB 內的流動資產組合淨值計算,已槓桿的累積賬面及已實現虧損約 23% (快活谷兄曰:「叻仔!」)。若計入倉外的備用現金,累積賬面及已實現虧損約 19%。以下虧損紀錄以不計入備用現金計算。

年初至今虧損分布如下:

已實現盈利/虧損

因換馬、策略性改變及簡化組合,筆者沽清了一些倉位。這些操作造成的損失已實現,約佔組合淨值 3%,永遠無法追回,是本次股災的教訓。

RW0U: 政治運動令內地旅客撤離,而又一城有三成生意來自陸客,加上香港人有一半不太喜歡它,香港投資者早已對其心灰意冷,只是筆者反應遲鈍而已。一月有幸在反彈高位減持後,日前決定沽清,資金留待換馬。由於一月減持的價格比年初還要高,它造成的永久虧損僅佔組合淨值 0.7%。

0659: 此倉位在年初才開始建立,本意是分析其主要業務已見底,新買入保險業務開始貢獻盈利,儘管收購價偏高,其股價從高位腰斬超過一半應已反映。結果中期業績不理想,武肺爆發更令其業務低處未算低,沒有公路收入,基建業務也受影響,其他內地業務亦極不樂觀。忍痛割蓆,永久虧損佔組合淨值 0.7%。

0371: 去年建倉,看中其穩定增長的派息。後見其跌幅小,成為換馬的犧牲品。永久虧損佔組合淨值 0.5%。

0576: 原意是逐漸取代受武肺影響而又未反映的 1052,不幸地建倉日正好是內地宣布公路免費的前夕,後成為換馬的犧牲品。永久虧損佔組合淨值 0.5%。

其他在期內清倉的還有 1052, 1109, 6823 及一系列美國公司債券或永續證券,原因多為換馬或「跌得太少」。因虧損不大或有盈利,故從略。

賬面虧損 - 重倉證券

重倉證券只有三項,分別是 0823, 1883 和 2588,每項佔總流動資產皆逾 10%。本來 RW0U 是第一大倉,但因已清倉,故紀錄在上一部分。

0823: 在政治風波後期才開始收集成第一大倉,惟太早買入,賬面虧損佔組合淨值 2.2%。

1883: 倉內長期鐵膽,在武肺爆發前後較低位增持,賬面虧損僅佔組合淨值 0.6%,堪稱組合的定海神針。

2588: 筆者愛恨交纏之股票,縱使業績理想,派息增長優於預期,但受武肺影響航空業拖累,上週五最惡劣時一度從歷史高位累挫 45%,股息率高達 6%。以前老是想等股息率升至 4% 以上便增持,明顯低估了武肺威力,過早入市。賬面虧損佔佔組合淨值高達 7.5%,令組合孖展出現壓力

其他造成較大賬面虧損的證券

VAL 6.875% 2020: 還有四個半月便到期的鑽油公司債券,受石油價格戰及公司債市流動性不足拖累,成交價低見 35,令賬面虧損佔佔組合淨值暴升至 2.2%。

BPY.UN: 一間以北美物業投資業務為主、類似私募房產基金的公司,買入時息率已超過 7%。雖然倉位不多,但不知何故被狂沽,賬面虧損佔組合淨值 1.4%。

AW9U: 價格長期在 S$1 附近徘徊,息率甚高,筆者當它是債券來買入,不奢望賺價。結果近來也被人當 ATM 狂沽,賬面虧損佔組合淨值 1.0%。

其他公司債券或永續證券: 同樣因流動性不足,被不問價沽貨,上週五美市反彈後情況已改善,但賬面虧損仍佔組合淨值 2.6%。

中長期投資戰略

這一次股災暴露了筆者倚靠流動資產組合收入維持退休生活的問題。三個重點:

1) 槓桿
2) 重股輕債
3) 入市策略

槓桿的好與壞已不用多說,孖展 call 倉死得人亦是阿媽係女人的問題。問題是,又要槓桿,又不以債券為主,又不是有大量債券作收息及再投資基礎(即係身家未夠班),又常常姣婆守唔到寡跌少少便入市。

幾點要謹記的教條,執行上幾乎全部違反,在雙黑天鵝、兩次美帝熔斷當前卻僅輸 23%,槓桿下竟然還能跑贏歐洲股市,筆者覺得已經要劏雞還神了!

因此,組合在等待復原的同時,筆者也急不及待要針對以上幾點,極大幅度地調整中長期投資戰略

命裡有時終需有,等我。

留言

  1. 我也是汗顏...雖然當時明明知道市場走勢不合理, 但倉位仍維持新高, 不斷用"減息必需買資產"麻醉自已. 結果慘不忍睹...

    目前決定不作任何撈低, 適時先減持部份股票為上, 餘下的例如001 由於己跌過龍, 我就由得佢了.....

    回覆刪除
    回覆
    1. 所以鐘兄的資產配置真心有用。
      可惜得番太小錢。
      呢個方法未必賺得多。但穩陣。

      KIT

      刪除
    2. 小弟認為這次屬於系統性風險, 資產怎樣分散也會下跌。

      刪除
    3. 大老R 可否分享下操作, 我都想知點做先可以"長期作戰"

      刪除
    4. 「減息必需買資產」正確,但控制注碼和槓桿也很關鍵。

      資產配置是非常重要,除了提升 risk adjusted return 外,也能減少很多不必要的波幅。沒錯對於系統性風險,資產無論怎樣分散也會下跌,但是相對溫和的波幅對於已退休或風險胃納較低的人來說,是非常重要的。若承受不了波幅在低位投降,無論回報如何可觀也不關你事了。

      老王兄,your question is a billion dollar question...我自身都難保,又能分享什麼呢。

      刪除
  2. 謝謝 R 兄出文分享, 今次波動係全面性, 不單單股票, 企業債, preferred stock, ETD 等都跌, 跌不止20% 以上。

    回覆刪除
    回覆
    1. 除股票外,其他大跌多是由於流動性瞬間 dry up 而導致。當恐慌性拋售出現時,最 vulnerable 的會率先被亂扔,例如與石油有關的公司。

      當「沒有市場」時,$1 的成交已足以令價格下跌至接近零。

      ETD 也不是隻隻跌20%以上,例如 ARGD, PPX, C.PRN 還能企穩在23蚊樓上。GasLog 嗰隻最慘烈,不足一個月跌咗70%...

      刪除
    2. C.PRN 一直26.xx - 27.xx, 買唔落手. 等咗咁耐, 而家落翻25蚊, 心癢難忍....

      刪除
    3. 視乎仲有無熔斷,每一次熔斷都會有一批質素更好的 ETD 被斬。

      刪除
  3. R兄, 加左槓桿都係輸20% 左右,絕對係叻仔。

    仲要跑贏大市....幾多股票都跌超過19%了。

    回覆刪除
    回覆
    1. 與其做叻仔急急腳輸錢,我寧願做慢慢贏的蠢仔好了...

      苦笑中...

      刪除
    2. 763 今日都跌左20%....

      一日已經可以達標。

      與其做叻仔急急腳輸錢,我寧願做慢慢贏的蠢仔好了...
      // 誠然。因快得慢非所願也。小子都係維持R兄的叻仔COMMENT不變。加槓桿輸20%在呢個浪潮真心係beat the market。

      刪除
    3. 過咗今日已經唔係呢個數了。

      刪除
    4. 金融的世界,專收叻仔.....

      刪除
    5. 蠢仔如我,一樣照收!

      刪除
  4. 謝謝R兄無私分享, 如何在波動市中繼續如常生活真的是一個課題.....
    剛開始下跌時還以為沒影響的東西, 在退潮來時才發覺自己漏左條泳褲係岸邊....

    回覆刪除
  5. 小弟也有一隻跟油有關的美債CHK 8月到期, 價已跌近一半, 現在斬已經太遲。

    回覆刪除
    回覆
    1. 既然就快到期,無需要考慮斬吧。

      之前隻MNK 2022 跌到2x蚊,而家仲企到57蚊,仲跌得少過部分ETD

      刪除
  6. REIT 下跌其實唔係太厲害 823為例跌咗大概15pct.. 低息環境下會再升返。公司債要睇下邊啲。短債下跌幅度大多是10pct以下。長債下跌比較厲害,我隻Ford 跌到哈哈哈。。。另外公司債一定!千萬!唔好買basic material ,energy 。 一個浪打埋呢啲就拜拜。

    回覆刪除
    回覆
    1. 大家都知低息和QE有利,但大家都驚自己捱唔過呢一關...

      短債如果唔關石油事,跌幅的確不大。我最重倉嗰三隻短債,全部 HYB 都仲係九十幾蚊。

      刪除
    2. 其實都係摸住石頭過河, 我margin唔係用得太盡,港股部份冇用,所以暫時ok。我賣出1883 etc 下跌得少的股票,買已跌的優質美股。
      如果太擔心孖展,可以考慮buy put 對沖一下。

      刪除
    3. LP 都有諗過,最怕左一巴右一巴。

      刪除
    4. 比錢買保險

      刪除
    5. 係,但 vol 咁高時,保費超級貴。

      刪除
  7. 659買入後,沒有及時走貨,現在損失慘重

    回覆刪除
  8. 開左槓桿都輸咁少真係好好了,熔斷果兩晚優先股一般都有雙位數跌幅,債券因為流動性所以更誇張,投資級別以下的好多買價都得返60-70,止蝕就變成越止越蝕(一開始守到8x-9x 果啲,因為大家都會先沽,在第二次熔斷時都要跌到得返7x,唔知今日會唔會斷第三次了)。

    睇美股個跌幅,之前個情況係咩分析都無用,根本唔理你間公司體質點都沽左先要錢唔要貨呢...

    回覆刪除
    回覆
    1. 沒錯,跌得太急太突然,好幾日都完全不問價沽貨...

      我手上的債仲頂到90-100蚊的...但唔知頂到幾耐。

      刪除
  9. R兄高槓桿在股災前,仍能只是負19%,已經好勁!
    學老王兄一句,這次股災可用來[証明到股場岩唔岩自己]。我給自己的答案是否定,股場不適合我。但仍然要再試。因為單蹄馬,絕對不是好事。

    回覆刪除
    回覆
    1. 謝謝三兄安慰。

      我同快兄傾過,作為一個退休廢老,個盤唔夠大,重股輕債好易臨老唔過得世。我都要努力再尋找更理想的資產配置才行。

      刪除
    2. 小弟最近也有思考過這個問題, 遇上現時這種情況, 就算重債輕股或者股債相約, 若投資組合內使用槓桿也有可能傷到本金的問題。因為當債的比例提升, 投資者應該購入質量較好的公司, 因為質量不好的公司如CHK, 一個石油價格戰足以令其價位由100減到最低30。但質量較好的公司息口往往較低, 不開槓桿回報便會拉低, 令到現金流減少。請問R兄可有良策?

      刪除
    3. 惟有盡量分散風險,唔同到期日的短債都要有,不考慮 Cyclical 行業,絕不持有長債。

      今次股災後,連 ETD 也要避開,或者只在股災遠低於25蚊時才入貨。

      刪除
  10. 今次危機發生時, 垃圾債券投資者 發現固定收益變成震倉來源, 風險源頭。跌市中持倉的股票跌10%,固定收益卻跌了20-30%,當中不少優先股,更下跌超過50%.
    最傻就係啲人將企業垃圾債券同國庫債券 都當係避險債券。
    很多人 以為債券 就係等於 最低風險投資物, 連企業債國債都未識分。

    回覆刪除
    回覆
    1. 小心控制槓桿,才可以讓債券坐到到期日。

      刪除
  11. equities既話,如果接受到成日出現false signals, 用好簡單既trend following techniques(例如50 day SMA), 我自己已成功避過18年尾同今次...其實避一次大既=贏三次細既...當然, 如果個倉係好龐大..出出入入唔係咁易

    bonds真係仲探索緊有咩method係簡單又實用

    回覆刪除
  12. 謝謝R兄的分享,提醒我當要退休既時侯點都需要少少既主動收入稍作緩衝。當突發的大崩盤降臨,都總有兩手準備,令到個心冇咁亂。
    關關難關關關過,相信R兄會企得返起身!

    回覆刪除
    回覆
    1. 最簡單的方法 - 多點 BUFFER 才退休,不要好像好咁掹掹緊。

      另外,長期投資策略要重新思考,要靈活一點,同時也以防守力為先。

      刪除
    2. 今次股災唯一令小弟想不通的是為何優先會暴跌。

      刪除
    3. 隔離場偉哥答了:「好景時, 個個都做大槓桿, 不論機構投資者或散戶, 現在資產價格跌, 就要齊齊去槓桿, 什麼貨都沽, 已經唔關隻股基本因素事, 而係要套現, 不然就爆倉, 因此乜價都要沽。

      有做槓桿的網友應該明白這個道理, 所以唔好話ETD、優先股, 香港而家好多股票都有10%股息率了, 只係物賤鬥人窮, 悲哀。」

      刪除
  13. 现在Aus 資產最抵買!

    回覆刪除
    回覆
    1. 從我開始搞移民時,澳元已被說抵,跌下跌下...差不多20%...

      刪除
  14. 作者已經移除這則留言。

    回覆刪除
  15. 記得Blog主好像是最初買港樓致富,為何捨易取難?港樓向來跟升不跟跌,高槓桿但不會call margin(前題租客乖乖交租幫你供樓),現金流強(息低+整劏房),未來零息又QE,又是各位發上發的機會

    回覆刪除
    回覆
    1. Mark兄,樓的好處我當然知道,但你的問題筆者也很想問自己。
      起碼有幾個原因吧:

      1) 港樓已無人頭再買,就算肯交 15% BSD,要再借 Multiple 按揭難度也高。
      2) 筆者設計流動資產收息組合是為了退休,港樓租金只夠供樓,無法支持生活。
      3) 筆者已移民,不過即使不移民也不會考慮搞劏房。個人原因無需討論。
      4) 稅務問題。
      5) 去年反佔中運動衍生的政治風險也在考慮之列。

      最後,雖然筆者移民了,但並無賣樓。香港物業仍佔總資產近七成,仍可享用未來零息和QE的好處。

      刪除
    2. 補充一句,過去三年在流動資產賺錢時,筆者並沒有聽到類似的意見。

      為何今天卻終於聽到呢?究竟是「跌市方知物業好」,還是「輸錢皆因贏錢起」?

      真是值得深思。

      刪除
    3. 雖然我都相信QE之下再加上供應不足,港樓長遠會非常之好。但係係股災之下港樓真係可以唔跌?

      刪除
    4. 股票從來没有變過啊!

      Anyway, 加油!

      刪除
    5. 在不會 Call Margin 的前題下,一件資產如果長遠係會升,甚至大升,短中期升跌根本不重要。港樓就是擁有這個優勢,才能在強勁基本因素下讓大部分人賺錢。

      基本因素良好的流動資產無處不在,問題是你能否捱過 market sentiment 不好的日子。

      刪除
    6. “在不會 Call Margin 的前題下,一件資產如果長遠係會升,甚至大升,短中期升跌根本不重要。”
      咁其實股票倉一日未到call margin 果一刻,係咪都可以用同一諗法呢?甚至乎如果有備用現金,其實根本唔使去槓桿?只要減少少唔比人call 就得,唔使cut loss?

      刪除
    7. 呢個諗法如果遇上一個漫長的熊市,不斷減少少會輸得最多。

      熊市/股災來臨,一係就直接 cut 到無槓桿,進入冬眠狀態;一係就等佢斬倉,闊佬懶理。

      千祈唔好見槓桿比率飆升先來慢慢去貨,絕對會輸到你永不翻身。

      刪除
    8. 又問,如果係漫長熊市,等佢斬倉闊佬懶理點解會比慢慢去貨好?因為後者代表要賤價沽?咁沽完可以更賤價再買返啫。
      上面你提到 “ 一件資產如果長遠係會升” 係咪先係重點?即係話無論股樓,確認長遠升值似乎係坐貨嘅必要條件

      刪除
    9. 估佢沽完可以更賤價買返,即係純粹炒價。

      炒股票其實隨時都可以做,唔係淨係股災先做得。

      刪除
  16. 本熊跟R兄嘅情況十分十分近似:
    1.放棄咗主動收入
    2.打算用手上資產產生現金流過活
    3.目前流動資產輸緊20%左右
    4.近日跌市日日都減持去槓桿
    本熊現在:
    5.lv實貨連sp amt 仍然在1.0以上,雖然未被call loan
    6.struggle 緊全清當去到一個點e.g.-30%,還是減到nlv >1:0 算了

    回覆刪除
    回覆
    1. 4) 點解要日日都減持,唔一次過?

      6) 我都 struggle 過,應該唔會全清了。

      刪除
    2. 6) 就係 4)嘅答案呀R兄😢

      刪除
    3. 明白...

      如果甚麽都不做,現在可能腰斬一半以上...視乎你買了什麼。

      刪除
  17. 想問你依家即刻決定轉投資策略,定係會等一排價格回復先轉?如果即刻轉,咁就要被逼低位放手上資產,即刻realized 20% loss. 如果等,又如果知道價格唔會再向下?
    其實好似係問緊最basic 問題... 即係跌市應該止蝕齋坐定再入。但我想知好似板主咁心目已經有既定投資戰略 (我估你應該已經有) ,咁嘅市況會點樣執行?thx

    回覆刪除
    回覆
    1. 跌幅已經硬食,即刻全清就無乜可能,而家策略係先令個倉死唔去,等重光之日再逐漸調整策略至目標。

      刪除
    2. 我都頭痕緊點樣做, 暫時嘅諗法係, 將1.2嘅槓桿比率 減到一, 即係冇 槓桿, 資金就由mortgage link嗰度攞。

      刪除
    3. Ellis ctse 這的確係一個非常有效的方法。

      馬後炮,應該一開始就從這個角度出貨,剩下的才有資格鬥長命。

      刪除
  18. 我諗要重新檢視呢種投資策略,債+REIT+ 槓桿, 是否退休人士應該持有。 如果不是,那應該要持有乜嘢組合又可以達到滿足生活之現金流。

    回覆刪除
    回覆
    1. 我反覆思考過,每件投資工具本身都有佢ge優點同缺點,綜合各種因素我仍然認為資產配置、分散風險及控制槓桿係最重要。

      刪除
    2. 同意, 其實我覺得槓桿比率 決定於你自己有幾多buffer, 同埋投資物嘅 估值, 我個portfolio 槓桿比率又開頭嘅1.5 到而家嘅1.2, 長期嚟講係去槓桿, 今次呢件事, 又係黑天鵝 又有邊個預期到, 港股本身 估值唔高, 所以都冇減持, 而家亦都唔想減持, 希望可以捱過呢個難關。

      刪除
    3. 如果有buffer, 本來就可不用槓悍。今次有好多债跌左一半! 公司破產都不過如是! 遠超過股票大盤跌幅。

      我只是比較好彩,剛剛有一筆現金在手,再 套現一些股票,把槓桿完全歸O,但已經沒有多餘資金撈底。 如果是一個退休人士,沒有主動收入,情況就非常危險。

      刪除
    4. RC 兄所言甚是,我自覺境況凶險非常。

      其實如果沒有槓桿,壓力差很遠,最多賺少啲,不會搞到一敗塗地。

      刪除
  19. BPY個盤超大,但應該係好似blackstone個類高槓桿運作

    Singapore reit呢排被洗倉

    回覆刪除
    回覆
    1. 高槓桿就一定,REIT同理,所以我都係當佢REIT咁買。

      今次股災,幾乎全球所有收息工具都係沽極都仲有得跌,好明顯有唔少買呢啲工具的人之前槓桿極高,刻下不斷被斬倉。越高息,跌得越甘。

      刪除
  20. >R兄高槓桿在股災前,仍能只是負19%,已經好勁!

    十分同意三兄的comment!

    我仍末買過債,而近日才爬回貴blog舊文,獲益良多,先行謝過;想請教,我在貴Blog 舊文中get 到的意思是,買債,息率是鎖定的,只要間公司没有default,繼承派息,而到期時亦按脹面價發還本金,其實中間債價升跌(即近日的波動)是沒有關係的?Sorry,我的問題可能好蠢,但對債券我仍然係盲毛...

    回覆刪除
    回覆
    1. 米兄,跌幅早已不是這個數啦,只係未有時間埋單而已。

      你說的只適用於直債,對於近日暴跌的永續債並不適用。

      刪除
  21. 要作戰 便作戰
    遇強愈強 ,看誰笑到最後

    回覆刪除
  22. R兄出生同退休都遇上股災。如果像87年還好,當時實體經濟冇問題,最怕係中美冷戰甚至熱戰開始(其實中美都有轉移視線既需要),好多以因globalise帶來既scale up同cost cut好可能去到盡頭,通漲唔會咁低,而好多公司既摃桿都一去不返,如多數油同能源公司, 咁可以投資既野會少好多。

    回覆刪除
    回覆
    1. 命中注定......

      今次股災,又 unprecedentedly 放水,又谷實物資產同美股。同一招式不停翻用,我相信下一次升浪,升幅會更集中,整體金融系統風險亦會更集中....人會重覆犯錯,到下一次去槓桿慘烈程度....無法想像。

      刪除
  23. 我最怕只是上半場......

    回覆刪除

張貼留言

這個網誌中的熱門文章

澳洲稅務入門 (2) - 稅務居民的稅制

九月流水賬 (2023)

四月流水賬 (2023)

八月流水賬 (2023)

五月流水賬 (2023)

六月流水賬 (2023)