一則笑話

放假,但似乎無人開心,而家心情好似國定殺戮日 (The Purge) 前夕咁。

一世人都無試過好似而家咁想日日返工,估唔到臨退休竟然會咁諗。

氹下自己,作個唔係幾好笑ge笑話。

講明先,點到即止,好笑笑下就算。

唔好笑都唔緊要,反正大家心情已在絕對零度,都無得再差了。


一對男女為結婚買樓的事吵架。

男:R兄話自住要買樓,我已決定要買這個新盤。

(大佬咪擺我上枱先得假)

女:R兄話要買樓,但無叫你為咗買新樓要住到山旮旯咁遠!

男:其他方法已經考慮過,無辦法。我已經入飛,AA話好大機會中,聽日就買。

女:首期嚿錢大家都有份出,你唔洗同我商量過就決定,有無搞錯?

男:老母同班親戚朋友都撐我買,唔洗諗梗係去馬啦。

女:吓,我班姊妹無人撐買喎。咁大件事都可以繞過我?

男:而家咪同你商量緊囉!

女:你而家唔係商量喎,你係通知緊我!

男:總之我已經決定咗買。再煩就鬧到你收聲,再唔收聲就打到你收皮!

...(敏感事件已屏蔽)...

男:好啦好啦,雖然我買樓初心無變,但再諗下先啦。我就不當處理買樓事件向你致

...(敏感事件已屏蔽)...

男:入飛已經壽終正寢!The 飛 was dead!

...(敏感事件已屏蔽)...

男:喂,你好啦喎!道咗歉,鬧又鬧過打又打過,而家都話正式決定唔買囉,點解你仲係唔肯收手?

女:一早已經唔關買樓事,係你態度問題!

男:我知,上次車你返來嗰個鬼佬叫你唔好買丫嘛!

女:我都話嗰個鬼佬係我上司囉,唔通我話你小氣唔畀我搭佢順風車咩!

男:明明成件事就係由買樓開始,而家都話唔買囉,我都讓哂步,你仲話我小器。你想點姐?

女:小器都唔係呢件事!你態度咁差,喊打喊殺,你想點?

男:我想氹返你坐低傾你又唔接受,究竟你想點先?

女:你日日兇神惡煞咁,有人咁樣氹人咩?我問你想點先真。

男:...

女:...

男:由於情況緊急,我同死黨開會決定將首期嚿錢拎來買跑車,有現貨,而家去攞車。以後每日車你返工放工,唔洗再上鬼佬車,希望你會唔再嬲我啦。

女:後日重陽節,有咩留返拜山先講。

當每日都處於白色恐怖中,其實黑色幽默真係唔係幾好笑。

不過都係嗰句啦,難行日子不削我對生命眷戀。

大家加油,為自己的生命繼續努力!

留言

  1. 唔知點解,睇完我笑唔出,淨係想喊。對唔住,浪費左你一番好心⋯

    回覆刪除
  2. 我覚得女方未必全部回應都係 "......", 而係去到中後期不停向男方乱掉野同埋不停喺fb 度向佢啲姐妹呻。

    回覆刪除
    回覆
    1. ... 本來係一系列數字嚟嘅,不過話明笑下就算,就無謂加鹽加醋了。

      刪除
  3. 多謝R兄的黑色幽默,除左追求往後的自由,也是時候停一停,抖一抖!看看身邊的家人了。

    回覆刪除
    回覆
    1. 多謝支持,假期應該用來休息,不是用來出擊的。

      刪除
  4. 睇完....沉默了....

    回覆刪除
  5. 笑唔出,但係喊得出。SORRY

    回覆刪除
    回覆
    1. 芝蛋兄,有人性值得欣賞。但事已至此,也許要抽離一下。

      刪除
  6. //男:由於情況緊急,我同死黨開會決定將首期嚿錢拎來買跑車,有現貨,而家去攞車。以後每日車你返工放工,唔洗再上鬼佬車,希望你會唔再嬲我啦。

    係呢句度真心笑左, 如果俾我改劇情, 我會改: 由於情況緊急, 我已經幫我地即時註冊左, 而家我地真正兩公婆啦, 氹返你啦, 我地而家結左緍啦, 希望你會唔再嬲我啦。

    回覆刪除
    回覆
    1. 咁改都唔錯喎,哈哈!貼切啲不過要律師幫手犯法冒簽!

      刪除
  7. 白色恐怖 黑色幽默嗰個位笑咗。多謝R兄。肯講笑話的網友要多多支持。

    回覆刪除
    回覆
    1. 多謝 cool 兄欣賞,希望大家多點笑容、少點戾氣。

      刪除
  8. R兄這篇所謂笑話,既不好笑,亦脫離現實甚遠,個人認為水準以下。

    如果男方是挪用資金買跑車的話,原因竟只是女方搭過一次順風車而已?個人認為,至少需改寫為女方天天都在搭順風車,還和鬼佬上司天天去酒店"吃早餐",而且還把男方的舊座駕放火燒了。

    回覆刪除
  9. 如果係呢個CASE,個女人係錯嫁喎.....

    男:你做乜未問過我,就check我電話?
    女:你做乜咁惡話我!
    男:咁你未問過我,就check我電話嘛
    女:而家個問題唔係check你電話,而係你態度有問題
    男:我承認我態度係惡左D,對唔住
    女:算啦,我原諒你。

    回覆刪除
  10. 真想不到 R 兄的留言,竟有那麽多女博主捧場(芝蛋治,Cool兄。。。。)笑咗!草上飛

    回覆刪除
    回覆
    1. 草上飛兄,證明我平時寫啲嘢太悶,吸引唔到一眾女神青睞!

      刪除
  11. R兄,我剛剛加注左1883了。

    回覆刪除
    回覆
    1. 師兄果然好耐性!
      上星期預測息率去到7.3%,我也春心盪漾。

      刪除
  12. 男女關係的特點是在有衝突的時候,不論哪一方有道理、也不論哪一方有沒有錯或錯在何處,如果沒有其中一方以一種不理智但在感性上講得通的方式無條件讓步,很自然地衝突只會越演越烈,甚至會發展成決裂。

    原本我寫這篇文,焦點並非政治事情的細節,而是想指出政權與(部分)人民的對立已經發展到像男女關係般糾纏不清。

    抱歉我沒說明白,讓讀者失焦了。

    回覆刪除

張貼留言

這個網誌中的熱門文章

澳洲稅務入門 (2) - 稅務居民的稅制

九月流水賬 (2023)

四月流水賬 (2023)

八月流水賬 (2023)

五月流水賬 (2023)

六月流水賬 (2023)